TAIFA STARS YAAGA RASMI AFCON BAADA YA KUPOTEZA DHIDI YA MOROCCO
Safari ya Timu ya Taifa ya Mpira wa Miguu ya Tanzania, Taifa Stars, katika mashindano ya Kombe la Mataifa ya Afrika (AFCON) imefikia tamati baada ya kupoteza kwa bao 1–0 dhidi ya wenyeji Morocco katika mchezo wa hatua ya 16 bora uliochezwa nchini humo.
Katika mchezo huo mgumu na wenye ushindani mkubwa, Taifa Stars ilionesha upambanaji, nidhamu na ujasiri, ikiwapa wakati mgumu mabingwa hao wa Afrika Kaskazini. Hata hivyo, bao moja la Morocco lililofungwa kipindi cha pili liliwafanya Watanzania kukosa tiketi ya kuendelea hatua ya robo fainali.
Licha ya kupoteza, Taifa Stars imeondoka AFCON ikiwa imeacha alama kubwa ya kihistoria, baada ya kufuzu hatua ya 16 bora kwa mara ya kwanza katika historia ya mashindano hayo. Mafanikio hayo yamewapa faraja na fahari mashabiki wa soka nchini, wakitambua maendeleo makubwa ya timu yao ya taifa.
